Võro Seltsi noorõ kävevä külän karjala nuuril
Võro Seltsi noorõq liikmõq kävevä 7.-10. mail külän Joensuun karjala keele aktivistõl. Nuuri võtsõ vasta Hummogu-Soomõ Ülikooli Karjala osakunna aktivistõ rühm ja reisi avit kõrraldaq soomõ-ugri kiili aktivist Nico, tunnõt sotsiaalmeediän ku Segasukukiel. Reisi iinmärk ollgi tuu, et võrokõsõ ja karjalasõ saanu inämb umavaihõl tutvas, selle et nuuri elo mõlõmba kultuuri man om küländ sarnanõ – liinaelo ja muu maailm tulõ pääle, a iks om tung uma juuri ni keelega inämb tegeldä.
Edimäne päiv läts’ müüdä ülikoolin, kon peeti ettekandit ütstõõsõ keele olokõrrast ja revitalisiirmistüüst. Joensuun saa karjala kiilt ja eri murdit kõrraligult oppiq, tetäs keelekohvigut vai jututsõõri, om tandsutsõõr ja muu kokkokäümine. Võrokõsõ näüdässi umalt puult võrokeelist Minecrafti ja Janek tekk’ väiku võro keele tunni. Inämbüs juttõ peeti karjala keelen, millest olõki-s väega rassõ arvo saiaq.
Õdagu oll’ kontsert, kon laulti laulõ segäsugulaiskeelen, väiku perreandsambli karjala keelen ja Kaisa ni Elo võro keelen.
Tõsõl pääväl käüti muuseumin, kon om kõrralik vahtsõnõ näitus karjaisi elost, naisi elost, kultuurist ni keelest. Sis laulimi huviliidsiga rahvalaulõ ja õdagu peeti tantsutunn. Kaisa ni Eliisabet opassivä võro tantsumänge ni karjalasõq ummi.
Kõgõ põnõvamb oll’ kõnõldaq ütstõõsõ elost, keele olokõrrast, poliitigast ni arvamuisist olokõrran, ku kumbki riik periselt kiili ei tunnistaq ja elätäs küländ vinne küle all. Loodami, et saamiq konagi ka Võrol kokko.
– seltsilidsõq Hipp, Elo, Eliisabet, Mihkel, Dorian, Kaisa ja Janek, pluss Sirlen
Kultuurivahetusreisi tugõsi Eesti Kultuurkapital
