Võro Selts VKKF    78 28 750; 5649 2686    vorokiil@gmail.com

Võro Selts Võro Selts

XXXVIII Kaika Suvõülikooli matkapäiv tulõ 15. augustil Navi külän

Kaika suvõülikuul, kõigi võrokõisi suvinõ kokkosaamispäiv, tulõ timahavva 15. põimukuu pääväl Navil Koroli talo küünü all! Külän, miä om andnuq hulga kultuuri-, kunsti-, tiidüs- ja muid häid inemiisi nii võro kultuuri ku laemba Eesti elo jaos.

Suvõülikuul tuu kokko kõik võrokõsõq ja võro keelest ni kultuurist huvitõduq inemiseq, et saanuq ütenkuun kullõldaq ettekandit tiidüs- ja kultuurivaldkunnast, saiaq tutvas üte Vana-Võromaa paigagaq ja märgotaq tulõvigu üle. Väega oodõduq ommaq ka kohaliguq!

Suvõülikooli rektri om timahavva Navilt peri Timmi Talis, kiä opp aoluku ja tund huvvi välispoliitiga vasta.

Paiga pääle ni minemä saamist piät egäüts eräle kõrraldama, bussiühendüs Võroga om hää. Süvväq-juvvaq pakk peremiis väiku raha iist, ossa võtminõ om massuldaq.

Kava


11.00 suvõülikooli vallalõtegemine, rektri määrämine
11-14 ettekandõq – esitlusõlõ tulõ vahtsõnõ võro keele grammatigaraamat, kõnõldas aoluust, folkloristikast ni järgmädse Võrokõisi Kongressi kõrraldusõst
14.00 lõunapaus
15.00 matk – iist vidä Timmi Talis
17.00 karmanihelü “Poodi man” avalik salvestus – kõnõlõsõq Navil üles kasunu keeletiidläne Jüvä Sullõv ja kunstnik Navitrolla

Umbõs kellä kuvvõst lõpõtamiq päävä iloõdakuga, saa kullõldaq võrokeelist muusikat ni juttu aiaq.
Päävä joosul saa pruuviq ka vahtsõt võrokeelist Minecrafti mängu ja ostaq võrokeelitsit raamatit.
Suvõülikuuli kõrraldas Võro Selts VKKF-i nuuritoimkond: Saarõ Hipp, Rahmani Elo, Tammõ Dorian ja Brauni Mihkli. Tüüd tukõ Eesti Rahvakultuuri Keskus, üten avitas Võro Instituut.

© 2019 Võro Selts VKKF