Minecraft tõlgiti võro kiilde
2024. aastaga suvõl sündü Võro Seltsi liikmil Saarõ Hipõl ja Brauni Mihklil mõtõ pandaq Minecrafti puutrimäng võro kiilde. Minecraft om üts maailma kõgõ inämb mängit ja erinevile kiilile tõlgit puutrimäng, miä om inspiriirnü mängmä erinevid põlvkundõ uma maagilidsõ ehitämis- ja kaivandamismaailmaga, kon egäüts saa valla laskõ uma loomingulisõ küle ja tetäq midä taht. Varramba om tuud pruugit ka saami keele oppamisõs, nii et hää näüdüs sugulasrahvilt oll kah joba olõman.
Minecrafti saa ütisloomõkeskkunnan Crowdin tõlki egäüts ja anda soovituisi tõisi kiili jaos. Inne tull sõski saia luba Minecrafti kogokunna tõlkmisõ haldajidõ käest, kiä kinnitivä, et võro kiil om mängo väega oodõt, a inne tulõ är tõlki 70% sõnnust, et olnu kimmäs, et tüü iks tettüs saa ja poolõlõ ei jää.
Sis saiõ kokko tiim inemiisist, kiä Minecrafti tõlkmisõga pääle naksiva. Päält Hipõ ja Mihkli võeti üten ka Rahmani Henn, kiä võtsõ Minecrafti tõlkmisõ hindä keskkooli praktilidsõ tüü teemäs. Tõlkmisõ ekspertiisiga avitiva võro keeletiidläse Jüvä Sullõv ja Fastrõ Mariko, et kiil mängon saanu iks kõrralik. Sis saiõ selges tuu, et õnnõ keeletiidläse ütsindä mõista-õi mängo esieräliidsist tegeläisist ja ülesandist arvo saiaq, nii et tegüsi põlvkundlik kuuntüü ja kampa tulliva ka Iva Jako ja Saarõ Hindrik.
Tõlkmisõ tüü käve tüürühmä kokkosaamiskuunolõkidõga, kon saiõ umavaihõl asju läbi arota ja egäüts uma puutrin järjest sõnno ümbre pandaq. Maastigu- ja eläjänimmi tõlkmisõ man olliva abis ka Kalla Urmas ja Saarõ Evar. Pallo om mängon seen säändsiid sõnnu, midä viil võro keelen pruugit olõ-õi, miä omma peri Ameeriga vai muu ilma luudusõst. Tõsõs om mängon ka säändsiid asju, midä peris elon sukugi olõman olõ-õi.
Üts suur jupp mängost oll võrokiilse heraldika vai vapisõnno luuminõ. Mängon saa meisterdä hindäle erinevid lippõ ja vappõ. Herialdikasõnnu süsteemi võtsõ hindä pääle Henn, kiä kaiõ hoolõga, et vapisõnaq olnuq ka säändse, miä mängost vällänpuul pruukmisõs kah õigõq olnuq.
2026 aastaga lehekuun saiõ 70% mõngost tõlgit ja Mojangi inemiseq panniva keele joba mängo pruuvmisõ variantsi vällä. Tõlkmaldaq materjal panti mängo eesti keelen. 16. piimäkuu pääväst 2026 läts võro kiil joba põhimängo valikulõ vällä.
Kuis mängi saa?
Mäng om võro keelen egäl puul kätte saiaq, a tuu tulõ hindäle mängmises osta Minecrafti umaniku Mojangi ammõtligu lehe päält. Võro kiil om olõman õnnõ Java versioonin.
Meediän võrokiilsest Minecraftist:
Viil teedüst:
2026. aastaga võro keele nädälil 6. märdikuu pääväl sünnüs Võrol Kagukeskusen Minecrafti ütismängmise pido, kohe ommaq kõik huvilidsõq oodõt ütenkuun mängo mängmä. Üritust näge Facebookin.